O‘zbekiston Iqtisodiyot vazirligining “Texnologiyalar transferi agentligi” davlat korxonasi tugatiladi. Bu, “Gazeta.uz”ning xabar berishicha, Vazirlar Mahkamasining 28-avgustdagi qarorida belgilab qo‘yilgan.
Texnologiyalar transferi agentligi 2008-yili Fan va texnologiyalarni rivojlantirishni muvofiqlashtirish qo‘mitasidan Iqtisodiyot vazirligi tasarrufiga o‘tkazilgan edi. Uning asosiy vazifalari innovatsion loyihalarni ishlab chiqish va ularni ishlab chiqarishga joriy etish, innovatsion texnologiyalarni, shu jumladan, xorijiy innovatsion texnologiyalarni mustaqil ekspertizadan o‘tkazish, moslashtirish va mamlakatimiz amaliyotiga joriy etish, ilmiy-texnik ishlanmalarni tijorat sotuvi obyekti sifatida ishlab chiqarishga joriy etish loyihalarini tuzish va amalga oshirish, ilmiy-texnik ishlanmalar natijalarini tijoratlashtirish sohasida xalqaro ilmiy-texnik hamkorlikni amalga oshirishdan iborat edi.
Hukumat qaroriga muvofiq, Iqtisodiyot vazirligi markaziy apparati xodimlarining cheklangan soni (150 nafardan 176 nafargacha) va vazir o‘rinbosarlarining soni (uch nafardan to‘rt nafargacha, vazirning birinchi o‘rinbosaridan tashqari) oshirilgan.
Izoh (0)