Yangi 2015—2016-o‘quv yilida 9698 ta umumta’lim maktablarida 4,5 million o‘quvchi ta’lim oladi, shundan 631 ming 274 nafar bolalar 1-sinfga qadam qo‘ydi. Ularning barchasiga “Prezident sovg‘asi” sifatida taqdim etish uchun 12 nomdagi o‘quv qurollari va o‘quvchi portfeli (ranets)dan, taqsimot asosida ta’lim muassasalariga yetkazib berildi. Bu haqda Xalq ta’limi vazirligi matbuot xizmati xabar bermoqda.
2-sentabr kuni Respublikaning barcha umumta’lim maktablarida yangi o‘quv yili boshlanishi munosabati bilan “Bilimlar kuni” tadbirlari bo‘lib o‘tdi.
Ta’lim muassasalari moddiy-texnik bazasini mustahkamlash maqsadida 2015-yilda investitsiya dasturi doirasida respublika bo‘yicha 384 ta maktabda qurilish-ta’mirlash ishlari amalga oshirildi. Shundan 29 tasi yangidan qurib foydalanishga topshirilgan bo‘lsa, 219 tasi rekonstruksiya qilindi, 136 tasi kapital ta’mirlandi. Ushbu maqsadlarga jami 341,8 milliard so‘m mablag‘ ajratildi.
Bolalar sportini rivojlantirish jamg‘armasi tomonidan 239,3 milliard so‘mlik 221 ta sport inshootlari hamda 5 ta bolalar musiqa va san’at maktablarini qurish, rekonstruksiya qilish ishlari bajarildi.
Joriy yilda jami 4517 ta ta’lim muassasalarini mebel, o‘quv-laboratoriya asbob-uskunalari, kompyuter texnikasi, sport anjomlari va musiqa cholg‘u asbob-uskunalari bilan jihozlash ishlari amalga oshirilmoqda. Qolaversa, umumta’lim maktablarining 1—4-sinflar chet tillari kabinetlariga 13,5 million AQSh dollarilik 6775 ta to‘plam sinf axborot-kommunikatsiya va o‘qitishning texnik vositalari yetkaziladi.
Yangi o‘quv yilida o‘quvchilarni darslik va o‘quv-metodik qo‘llanmalar bilan ta’minlash masalasiga ham jiddiy e’tibor qaratildi. Jumladan, yangi o‘quv yili uchun 454 nomdagi 25,7 million nusxa darsliklar va o‘quv-metodik qo‘llanmalari chop etilib, joylarga yetkazildi.
Izoh (0)