AQSh Geologiya xizmati mamlakatning eng baland tog‘i — Denali cho‘qqisining yangi balandligini e’lon qildi. Meduza’ning yozishicha, olimlar Denalining balandligini 6190 metr deb baholadi.
1950-yillarda o‘tkazilgan avvalgi o‘lchashlar natijasiga ko‘ra, cho‘qqining balandligi 6194 metrga teng deb hisoblanardi. Qayd etishlaricha, tog‘ning balandligi aslida pasaymagan, shunchaki uning balandligini eski texnologiyalardan ko‘ra yanada aniqroq o‘lchay oladigan qurilmalar yordamida hisoblab chiqilgan.
Tog‘ning balandligini aniq hisoblash uchun iyun oyida alpinistlar cho‘qqiga ko‘tarilib, u yerga GPS uzatgichini o‘rnatgan edi. Cho‘qqiga ko‘tarilish uchun to‘qqiz kun vaqt ketgan, bu haqda Geologiya xizmati saytida hisobot e’lon qilingan edi.
AQSh prezidenti Barak Obama 31-avgust kuni mamlakatning eng baland cho‘qqisi nomini o‘zgartirgan edi. Cho‘qqiga Denali deb nom berildi — tog‘ Alyaskaning tub-joy aholisi orasida shu nom bilan atalgan. Tog‘ 1896-yildan beri AQSh prezidenti Uilyam Makkinli sharafiga Makkinli deb atalardi.
Izoh (0)