Sharqiy Yevropaning olti mamlakatida NATO shtablari ish boshladi

NATO alyans tarkibiga kiruvchi Sharqiy Yevropa mamlakatlarida oltita yangi shtab ochdi. Bu haqda “Interfaks” xabar bermoqda.

“NATOning kelasi yil iyul oyida bo‘ladigan sammitiga qadar mazkur yangi shtablarning barchasi to‘liq jangovar tayyor holatda bo‘ladi, deb umid qilyapmiz”, — dedi NATO rasmiy vakili.

Bolgariya, Latviya, Litva, Polsha, Ruminiya va Estoniyada ish boshlaydigan har bir yangi shtabda 40 nafarga yaqin harbiy xizmatchi bo‘ladi, ularning yarmi tegishli mamlakat armiyasi vakillaridan saralab olinadi.

NATOning Sharqiy Yevropadagi mazkur tayanch nuqtalarining asosiy vazifasi tezkor munosabat bildirish kuchlari bo‘linmalarining mashg‘ulotlarini rejalashtirish va muvofiqlashtirishdan iborat bo‘ladi.

Bundan tashqari, mazkur shtablar Rossiya prezidenti Vladimir Putin uchun o‘ziga xos signal sifatida ham ko‘rilmoqda. Boltiqbo‘yidagi sobiq sovet respublikalarida Moskva o‘z ta’sir doirasini mazkur hududlarga ham yoyishi mumkin, degan xavotirlar bor.