O‘zbekiston milliy terma jamoasining Yaman hamda Filippin terma jamoalariga qarshi o‘ynaydigan 23 nafar futbolchidan iborat tarkibi ma’lum qilindi, deb xabar beradi O‘zbekiston futbol federatsiyasi matbuot xizmati.
Yamanga qarshi o‘yinda Azizbek Haydarov diskvalifikatsiya sabab maydonga tusha olmaydi. Biroq Filippinga qarshi o‘yinda u terma jamoa safida bo‘ladi.
O‘zbekiston terma jamoasining Yamanga qarshi uchrashuvi 3-sentabr kuni “Paxtakor” stadionida soat 19:00 da boshlanadi.
3-sentabr kuni “H” saralash guruhida peshqadam Shimoliy Koreya terma jamoasi Manamaga borib, Bahrayn terma jamoasiga qarshi 3-tur uchrashuvida maydonga tushadi. O‘yin Toshkent vaqti bilan 18:40 da boshlanadi.
5 jamoa o‘rin olgan “H” saralash guruhida peshqadamlardan yana biri Filippin terma jamoasi bu turda dam oladi. Filippin futbol federatsiyasi 3-sentabr kuni Maldiv orollari terma jamoasi bilan o‘rtoqlik uchrashuvi o‘tkazilishi haqida ma’lum qilgan. O‘yin Toshkent vaqti bilan 22:00 da “Rizal Memorial” stadionida o‘tkaziladi.
O‘zbekiston terma jamoasi 3-sentabr kuni Yamanga qarshi o‘yinni o‘tkazib, 2 kun Toshkentda shug‘ullanadi va 6-sentabrda charter reysi orqali Filippinga uchib ketadi. 7-sentabrda Filippin va O‘zbekiston terma jamoalari ishtirokida matbuot anjumani, 8-sentabrda esa Filippin – O‘zbekiston uchrashuvi Toshkent vaqti bilan 20:00 da Bokayu Siti shahrida bo‘lib o‘tadi. 8-sentabr kuni, shuningdek, Dohada Yaman terma jamoasi Bahrayn terma jamoasiga qarshi 4-tur uchrashuvini o‘tkazadi. Shimoliy Koreya terma jamoasi 4-turda dam oladi va hozircha hech qanday uchrashuv o‘tkazishni rejalashtirmagan.
3-tur oldidan “H” saralash guruhida Shimoliy Koreya va Filippin ikkita o‘yindan keyin 6 ochko bilan peshqadamlik qilmoqda. Keyingi o‘rinlarni egallab turgan Bahrayn, O‘zbekiston va Yaman terma jamoalarida esa hozircha ochko yo‘q.
Quyida O‘zbekiston milliy terma jamoasining Yaman va Filippinga qarshi o‘yinlar uchun tanlab olingan 23 nafar futbolchidan iborat tarkibni keltirib o‘tamiz.
Darvozabonlar: Aleksandr Lobanov (“Paxtakor”), Ignatiy Nesterov (“Lokomotiv”), Eldor Suyunov (“Nasaf”).
Himoyachilar: Davron Hoshimov (“Paxtakor”), Yegor Krimets (“Paxtakor”), Anzur Ismoilov (“Changchun Yatay”, Xitoy), Islom To‘xtaxo‘jayev (“Lokomotiv”), Shavkat Mullajonov (“Lokomotiv”), Vitaliy Denisov (“Lokomotiv”, Rossiya).
Yarim himoyachilar: Odil Ahmedov (“Krasnodar”, Rossiya), Server Jeparov (“Ulsan”, Janubiy Koreya), Vladimir Kozak (“Paxtakor”), Fozil Musayev (“Sepahon”, Eron), Sardor Rashidov (“Al-Jayish”, Qatar), Sanjar Tursunov (“Vorskla”, Ukraina), Stanislav Andreyev (“Paxtakor”), Javohir Sohibov (“Paxtakor”), Jasur Hasanov-katta (“Lokomotiv”), Sanjar Shoahmedov (“Lokomotiv”).
Hujumchilar: Aleksandr Geynrix (“Ordabasi”, Qozog‘iston), Temurxo‘ja Abduxoliqov (“Lokomotiv”), Igor Sergeyev (“Paxtakor”), Eldor Shomurodov (“Bunyodkor”).
Izoh (0)