Putin Sochidagi mashg‘ulot vaqtida 40 dollarlik krossovka va 1,4 ming dollarlik sport ishtoni kiygani ma’lum bo‘ldi

Rossiya prezidenti Vladimir Putin va bosh vazir Dmitriy Medvedevning Sochida birgalikda o‘tkazgan mashg‘uloti internetda faol muhokamalarga sabab bo‘ldi. “Sports.ru”ning qayd etilishicha, blogerlar mamlakat yetakchilarining mashg‘ulot vaqtida kiygan liboslari narxini hisoblab chiqqan.

Xususan, Dmitriy Medvedev mashg‘ulotlarda qiymati 140 dollarga teng Nike Air Max krossovkalarida shug‘ullangan. Putinning oyog‘ida esa Rossiyaning Forward brendi tomonidan tayyorlangan 2,7 ming rubllik (2-sentabrdagi kurs bo‘yicha taxminan 40 dollar) sport poyabzali bo‘lgan.

Sport ishtoni masalasida esa Putin xorijiy kompaniyaga ishonch bildirgan — mashg‘ulotlar vaqtida u Loro Piana’ning ipak va kashmiri aralashuvidan tashkil topgan, narxi 95 ming rubl (taxminan 1,4 ming dollar) bo‘lgan shim kiygan. Mazkur sport ishtoni ustidagi kurtkasi bilan birga 215 ming rubl (taxminan 3,2 ming dollar) turadi.