Rossiya mediaxoldingi Discovery Communications kompaniyasiga tegishli 10 ta telekanalni boshqaradi

Amerikaning Discovery Communications kompaniyasi va Rossiyaning “Natsionalnaya Media Gruppa” mediaxoldingi  (NMG) “Media Alyans” qo‘shma korxonasi tuzilishini tasdiqladi. Unda NMG 80 foiz, Discovery Communications esa 20 foiz ulushga ega bo‘ladi. Bu haqda Meduza xabar bermoqda.

Rossiyada qabul qilingan yangi qonunga ko‘ra, chet elliklarga mahalliy OAVda 20 foizdan oshiq ulushga ega bo‘lish taqiqlanadi. Mamlakatda esa Discovery Communications kompaniyasining Animal Planet, Discovery Channel, TLC, Eurosport kabi 10 ta kanali efirga uzatiladi.

NMG “Beshinchi kanal”, REN TV telekanallari, “Russkaya slujba novostey” radiostansiyasi, Metro va “Izvestiya” gazetalariga egalik qiladi, shuningdek, “Birinchi kanal” va “STS Media”ning 25 foiz ulushiga ega.