Xitoy xalq banki (Markaziy bank) 26-avgust, chorshanba kuni likvidlikni tartibga solish bo‘yicha qisqa muddatli vositalar yordamida mamlakat moliya tizimiga 140 milliard yuan (21,8 milliard dollar) kiritdi. Bu haqda, “TASS” xabariga ko‘ra, bank saytida e’lon qilingan rasmiy bayonotda ma’lum qilingan.
Likvidlikni tartibga solish bo‘yicha qisqa muddatli vositalar deyilganda Markaziy bankning qarz mablag‘lari tushuniladi. Joriy kungi operatsiya shartlariga muvofiq, mazkur mablag‘lar 6 kunlik muddatga 2,3 foiz stavkasi bilan taqdim etilgan.
Xitoy xalq banki 25-avgust, seshanba kuni 26-avgustdan boshlab bir yillik kreditlar uchun foiz stavkasini 4,6 foizgacha, depozitlar bo‘yicha foiz stavkalarini esa 1,75 foizgacha kamaytirishga qaror qildi (har ikkala holatda stavkalar 0,25 foizga kamaygan).
Bundan tashqari, bank tizimida likvidlikning maqbul darajasini saqlab turish maqsadida 6-sentabrdan e’tiboran moliya muassasalari uchun zaxiralash normasi 50 bazis punktgacha kamaytirilgan.
Markaziy bankning mazkur qarori Xitoy fond birjalari ko‘rsatkichlari pasayib borayotgan bir vaqtda qabul qilindi. Ma’lumot uchun, Xitoy birjalari 24 va 25-avgust kunlari mos ravishda 8 va 7 foizga kamaydi.
Izoh (0)