Xitoyning Tencent internet-gigantiga tegishli QQ servisi jahondagi eng ommabop messenjer deb topildi. Bloomberg agentligi tuzgan reytingga ko‘ra, servisdan 843 million kishi foydalanadi.
Ro‘yxatda ikkinchi bo‘lib 2014-yili Facebook tomonidan 18 milliard dollar evaziga sotib olingan WhatsApp bormoqda — undan jahon bo‘ylab 800 milliondan ortiq kishi foydalanadi. Facebook’ning o‘z mahsuloti hisoblangan Messenger’dan esa 700 million kishi foydalanadi va u uchinchi o‘rinni band etgan.
Reytingning avvalgi tahriridan keyingi eng kuchli o‘sishni Tencent’ga tegishli boshqa bir messenjer — WeChat qayd etdi: so‘nggi chorak davomida (aprel—iyul oylari oralig‘ida) mazkur servis foydalanuvchilari soni 37 foizga o‘sib, 600 millionga yaqinlashdi va Bloomberg reytingida to‘rtinchi bo‘ldi.
Undan keyingi o‘rinlarni Viber, Line va Snapchat egallagan. Isroilning Viber loyihasidan 249 million kishi foydalansa, Yaponiyada ommabop bo‘lgan Line foydalanuvchilari soni 211 millionga teng, o‘zini o‘zi yo‘q qila oladigan suratlarni almashish imkonini beradigan Snapchat foydalanuvchilari soni 100 millionga yaqin.
Bloomberg tahlilchilarining qayd etishicha, mazkur servislarning ba’zilarigina daromad keltirayotgan bo‘lsa-da, ular “elektron savdo, reklama va boshqa tijoriy imkoniyatlarni o‘zida birlashtirgan ekotizim uchun qurilish materiali” sifatida ko‘rilmoqda. So‘nggi ma’lumotlarga ko‘ra, investorlar WhatsApp’ni 83,6 milliard dollarga baholamoqda.
Izoh (0)