Хитойнинг Tencent интернет-гигантига тегишли QQ сервиси жаҳондаги энг оммабоп мессенжер деб топилди. Bloomberg агентлиги тузган рейтингга кўра, сервисдан 843 миллион киши фойдаланади.
Рўйхатда иккинчи бўлиб 2014 йили Facebook томонидан 18 миллиард доллар эвазига сотиб олинган WhatsApp бормоқда — ундан жаҳон бўйлаб 800 миллиондан ортиқ киши фойдаланади. Facebook’нинг ўз маҳсулоти ҳисобланган Messenger’дан эса 700 миллион киши фойдаланади ва у учинчи ўринни банд этган.
Рейтингнинг аввалги таҳриридан кейинги энг кучли ўсишни Tencent’га тегишли бошқа бир мессенжер — WeChat қайд этди: сўнгги чорак давомида (апрель—июль ойлари оралиғида) мазкур сервис фойдаланувчилари сони 37 фоизга ўсиб, 600 миллионга яқинлашди ва Bloomberg рейтингида тўртинчи бўлди.
Ундан кейинги ўринларни Viber, Line ва Snapchat эгаллаган. Исроилнинг Viber лойиҳасидан 249 миллион киши фойдаланса, Японияда оммабоп бўлган Line фойдаланувчилари сони 211 миллионга тенг, ўзини ўзи йўқ қила оладиган суратларни алмашиш имконини берадиган Snapchat фойдаланувчилари сони 100 миллионга яқин.
Bloomberg таҳлилчиларининг қайд этишича, мазкур сервисларнинг баъзиларигина даромад келтираётган бўлса-да, улар «электрон савдо, реклама ва бошқа тижорий имкониятларни ўзида бирлаштирган экотизим учун қурилиш материали» сифатида кўрилмоқда. Сўнгги маълумотларга кўра, инвесторлар WhatsApp’ни 83,6 миллиард долларга баҳоламоқда.
Изоҳ (0)