Moskvaning “Vnukovo” aeroportidagi Falcon samolyoti halokati ishi bo‘yicha ayblanuvchi sifatida qatnashayotgan qor tozalash mashinasi haydovchisi Vladimir Martinenko o‘z aybini tan oldi va ishni alohida tartibda ko‘rib chiqishni so‘ramoqda. Bu haqda “TASS” xabar bermoqda.
“Mijozim haqiqatan ham o‘z yo‘riqnomasi talablarini buzgan va jinoyat ishi materiallaridan kelib chiqadigan bo‘lsak, mazkur holatda aybni tan olish va sudning marhamatiga umid qilish eng yaxshi nuqtayi nazar hisoblanadi”, — dedi ayblanuvchining advokati Aleksandr Karabanov.
Sud ishni alohida tartibda ko‘rib chiqadigan bo‘lsa, bunda dalillar o‘rganib chiqilmaydi, ayblanuvchi o‘ziga qo‘yilgan aybni tan oladi, unga belgilanadigan ozodlikdan mahrum etish jazosi esa eng uzoq muddatining uchdan ikki qismidan oshmaydi.
Eslatib o‘tamiz, 2014-yil 21-oktabrga o‘tar kechasi “Vnukovo-3” aeroportida to‘rt o‘rinli Falcon samolyoti havoga ko‘tarilish vaqtida qor tozalash mashinasiga urilib, yonib ketgan va uchish-qo‘nish maydonchasiga qulagandi. Hodisa natijasida ekipajning uch a’zosi va bir yo‘lovchi — Total konserni rahbari Kristof de Marjeri halok bo‘lgandi.
Izoh (0)