Москванинг «Внуково» аэропортидаги Falcon самолёти ҳалокати иши бўйича айбланувчи сифатида қатнашаётган қор тозалаш машинаси ҳайдовчиси Владимир Мартиненко ўз айбини тан олди ва ишни алоҳида тартибда кўриб чиқишни сўрамоқда. Бу ҳақда «ТАСС» хабар бермоқда.
«Мижозим ҳақиқатан ҳам ўз йўриқномаси талабларини бузган ва жиноят иши материалларидан келиб чиқадиган бўлсак, мазкур ҳолатда айбни тан олиш ва суднинг марҳаматига умид қилиш энг яхши нуқтаи назар ҳисобланади», — деди айбланувчининг адвокати Александр Карабанов.
Суд ишни алоҳида тартибда кўриб чиқадиган бўлса, бунда далиллар ўрганиб чиқилмайди, айбланувчи ўзига қўйилган айбни тан олади, унга белгиланадиган озодликдан маҳрум этиш жазоси эса энг узоқ муддатининг учдан икки қисмидан ошмайди.
Эслатиб ўтамиз, 2014 йил 21 октябрга ўтар кечаси «Внуково-3» аэропортида тўрт ўринли Falcon самолёти ҳавога кўтарилиш вақтида қор тозалаш машинасига урилиб, ёниб кетган ва учиш-қўниш майдончасига қулаганди. Ҳодиса натижасида экипажнинг уч аъзоси ва бир йўловчи — Total концерни раҳбари Кристоф де Маржери ҳалок бўлганди.
Изоҳ (0)