Rossiya prezidenti Vladimir Putinga videomurojaat qilgan kursklik fermer ayol Anastiya Dolgopolovaning ma’lum qilishicha, hosilining bir qismini sud ijrochilari o‘g‘irlab ketgan. Bu haqda “Gazeta.ru” xabar bermoqda.
“Men yo‘g‘imda, mening ruxsatimsiz, meni ogohlantirmasdan kombayn kelgan. Aytishlaricha, odamlar kelib, “KamAZ”larga g‘allani ortib, qaytib ketgan. Kelganlar sud ijrochilari bo‘lgan. Ular taxminan ikki gektar maydondan hosilimni o‘g‘irlab ketdi”, — dedi Dolgopolova.
Fermer ayolning qo‘shimcha qilishicha, u yordam so‘rab huquqshunoslarga murojaat qilgan. O‘z navbatida, Kursk viloyati bosh sud ijrochisi yordamchisi Olga Dubininaning ma’lum qilishicha, ijrochilar ayolning dalasiga bormagan va hech narsani olib ketmagan.
Anastasiya Dolgopolova avvalroq Putinga qilgan videomurojaatida hosilni yig‘ib olish uchun puli va imkoniyati yo‘qligi, shu sabab dalani yoqib yuborish bilan tahdid qilgandi. Keyinroq Rossiya prezidentining matbuot kotibi Dmitriy Peskov Putinga qaratilgan videomurojaatdagi axborot tekshirilgani va aksariyat o‘rinlari haqiqatga mos kelmasligini ma’lum qilgandi.
Izoh (0)