Xitoyning Shanghai Salvage davlat kompaniyasi Janubiy Koreyaning o‘tgan yili cho‘kib ketgan “Sevol” paromini suv tubidan olib chiqish bo‘yicha tanlovda g‘olib bo‘ldi. Bu haqda Koreya Respublikasining dengiz va baliq xo‘jaligi vazirligi ma’lum qildi, deya xabar bermoqda “TASS”.
Vazirlikda ta’kidlanishicha, ushbu amaliyot kelgusi yil iyulida boshlanadi. 5-avgust, chorshanba kuni imzolanishi kutilayotgan shartnoma qiymati 73 million dollarni tashkil etadi.
Shanghai Salvage dengiz tubidan suv sig‘imi 6,83 ming tonna bo‘lgan paromni qismlarga bo‘linmagan va yoqilg‘isi to‘kilmagan holatda tortib chiqarishi lozim. Halok bo‘lganlardan kamida to‘qqiz kishining jasadi paromda qolib ketganligi taxmin qilinmoqda.
Eslatib o‘tamiz, parom 2014-yil aprelida Inchxon portidan Chejudo oroliga yo‘l olayotganida cho‘kib ketgan. Fojia oqibatida 300 nafardan ziyod kishi, asosan maktab o‘quvchilari va talabalar halok bo‘ldi. “Sevol” kapitani Li Chjun Sok umrbod qamoq jazosiga hukm qilindi.
Izoh (0)