Shanxay hamkorlik tashkiloti BMT Xavfsizlik kengashining Eronga nisbatan sanksiyalari tez orada bekor qilinishiga umid qilmoqda. Bu haqda ShHT bosh kotibi Dmitriy Mezentsev ma’lum qildi, deya xabar bermoqda “TASS”.
“Eron 2005-yildan beri ShHTda kuzatuvchi-mamlakat hisoblanadi, so‘nggi yillarda Eron tashkilot bilan munosabatlarni yangi sifat bosqichiga olib chiqa oldi. Biz bu harakatlarni olqishlaymiz va qo‘llab-quvvatlaymiz”, — dedi Mezentsev.
Uning aniqlik kiritishicha, Eron deyarli barcha vazirlik maydonlarida juda faol qatnashmoqda. “Shu munosabat bilan, biz BMT Xavfsizlik kengashining Eronga nisbatan joriy etgan sanksiyalari imkon qadar tezroq bekor qilinishiga tilakdoshmiz”, — deya qo‘shimcha qildi ShHT bosh kotibi.
BMT Xavfsizlik kengashi to‘rt marta — 2006, 2007, 2008 va 2010-yillarda Eronga nisbatan jazo sanksiyalarini qo‘llagan. Mazkur sanksiyalarga muvofiq, Eronga yadroviy texnologiyalar va materiallarni eksport qilish, qarz berish, ba’zi turga mansub qurollarni import va eksport qilish taqiqlangan, shuningdek, Eronning ba’zi jismoniy shaxslari va kompaniyalarining hisob-raqamlari muzlatib qo‘yilgan.
Izoh (0)