Malayziya bosh vaziri Najib Razzoq 28-iyul, seshanba kuni 1MDB davlat investitsiya jamg‘armasi bilan bog‘liq mojarolar sabab hukumat tarkibida o‘zgartirishlarni amalga oshirdi. Bu haqda “TASS” xabar bermoqda.
Jumladan, Najib Razzoqni 11 milliard dollar zarar ko‘rgani tufayli maxsus komissiya tekshirayotgan mazkur jamg‘arma direktorlar kengashi raisi lavozimidan ketishga da’vat qilgan bosh vazir o‘rinbosari Muhiddin Yasin iste’foga jo‘natildi. O‘z lavozimini saqlab qolgan holda mamlakat ichki ishlar vaziri Ahmad Zohid Hamidiy hukumat rahbarining o‘rinbosari etib tayinlandi. Undan tashqari, bosh prokuror Abdul G‘ani Patayl, atrof-muhitni muhofaza qilish vaziri Palanivel Govindasami, qishloq xo‘jaligi vaziri Ismoil Sabri Yoqub ham lavozimlaridan ayrildi.
Eslatib o‘tamiz, oy avvalida The Wall Street Journal bosh vazirning shaxsiy hisob raqamlariga 1MDB jamg‘armasiga yaqin kompaniyalardan 700 million dollar o‘tkazilganligi fosh etilgan maqolalar e’lon qilgandi. Ayni paytda Najib Razzoq yollagan advokatlar nashrga qarshi da’vo tayyorlamoqda.
Izoh (0)