Шанхай ҳамкорлик ташкилоти БМТ Хавфсизлик кенгашининг Эронга нисбатан санкциялари тез орада бекор қилинишига умид қилмоқда. Бу ҳақда ШҲТ бош котиби Дмитрий Мезенцев маълум қилди, дея хабар бермоқда «ТАСС».
«Эрон 2005 йилдан бери ШҲТда кузатувчи-мамлакат ҳисобланади, сўнгги йилларда Эрон ташкилот билан муносабатларни янги сифат босқичига олиб чиқа олди. Биз бу ҳаракатларни олқишлаймиз ва қўллаб-қувватлаймиз», — деди Мезенцев.
Унинг аниқлик киритишича, Эрон деярли барча вазирлик майдонларида жуда фаол қатнашмоқда. «Шу муносабат билан, биз БМТ Хавфсизлик кенгашининг Эронга нисбатан жорий этган санкциялари имкон қадар тезроқ бекор қилинишига тилакдошмиз», — дея қўшимча қилди ШҲТ бош котиби.
БМТ Хавфсизлик кенгаши тўрт марта — 2006, 2007, 2008 ва 2010 йилларда Эронга нисбатан жазо санкцияларини қўллаган. Мазкур санкцияларга мувофиқ, Эронга ядровий технологиялар ва материалларни экспорт қилиш, қарз бериш, баъзи турга мансуб қуролларни импорт ва экспорт қилиш тақиқланган, шунингдек, Эроннинг баъзи жисмоний шахслари ва компанияларининг ҳисоб-рақамлари музлатиб қўйилган.
Изоҳ (0)