Janubiy Koreyada Olimpiada o‘yinlari dasturidan o‘rin egallagan Taekvondoning WTF yo‘nalishi bo‘yicha o‘tkazilayotgan nufuzli xalqaro turnirda O‘zbekiston taekvondochilari tomonidan o‘tgan olti kunlik musobaqalar yakunlariga ko‘ra qo‘lga kiritgan medallari soni 32 taga yetdi. Bu haqda O‘zbekiston Milliy olimpiya qo‘mitasi xabar bermoqda.
Kattalar o‘rtasida o‘tkazilayotgan Korea Open musobaqasida bugungi kunga qadar uch nafar o‘zbekistonlik sportchi – bular amaldagi jahon chempioni Dmitriy Shokin (+87 kg), Jasur Boyqo‘ziyev (-87 kg) va Mustafo Valiyev (-58 kg) barcha raqiblarini mag‘lub etib, oltin medalga sazovor bo‘ldi.
Eslatib o‘tamiz, kattalar o‘rtasida o‘tkazilayotgan musobaqada 2016-yili o‘tkaziladigan XXXI yozgi Olimpiada o‘yinlarining yo‘llanmalari uchun reyting ochkolar o‘ynalmoqda. Mazkur musobaqada g‘oliblik shohsupasiga ko‘tarilib, 20 tadan reyting ochkoga ega bo‘lgan uch nafar o‘zbekistonlik taekvondochi dunyo reyting jadvalida tutgan o‘rnilarini yanada yaxshilab oldi.
Ma’lumki, mazkur ochiq chempionatda yoshlar, o‘smirlar va pumse yo‘nalishi bo‘yicha ham musobaqalar o‘tkazilmoqda. Unda ishtirok etayotgan o‘zbekistonlik yosh sportchilar bugunga qadar 11 ta oltin, 11 ta kumush va 7 ta bronza medalini qo‘lga kiritdi.
Bugun, 27-iyul kuni Koreya ochiq chempionatida so‘nggi kun musobaqalari bo‘lib o‘tadi.
Izoh (0)