Putin boshqirdistonlik o‘quvchi qizga o‘zining surati tushirilgan futbolka sovg‘a qildi

Rossiya prezidenti Vladimir Putin boshqirdistonlik o‘quvchi qizga o‘zining surati tushirilgan futbolkani sovg‘a qildi. “TASS” xabariga ko‘ra, sakkizinchi sinf o‘quvchisi hisoblangan Regina Moskvichevaga sovg‘ani federal nazoratchi Nikolay Razbejkin topshirgan.

Oq futbolkaga Vladimir Putinning surati tushirilgan bo‘lib, surat ostiga: “Do‘stlarni yolg‘iz qoldirmayman!”, — deb yozib qo‘yilgan.

“Bir muddat avval Regina Vladimir Putinga maktub yo‘llab, undan o‘z tasviri tushirilgan futbolka yuborishni so‘ragan edi. Rossiya prezidenti ma’muriyati Reginaning murojaatini ko‘rib chiqib, uning mehnatsevarligiga e’tibor qaratdi, keksalarni hurmat qilishi, o‘z ustida ishlashi, ezgu amallar bilan shug‘ullanishi va mas’uliyatli ekanligiga ishonch hosil qilib, Boshqirdiston Respublikasiga posilka yuborishga qaror qildi”, — deyiladi federal nazoratchining matbuot xizmati xabarida.

Regina Moskvicheva — a’lochi, sportchi, kichik fanlar akademiyasida “Ulug‘ Vatan urushi yillarida mening oilam tarixi” nomli tadqiqoti bilan birinchi o‘rinni egallagan. Moskvichevlar oilasida olti farzand bo‘lib, Regina eng kenjasi hisoblanadi.

Avvalroq Rossiya prezidenti qirg‘izistonlik maktab o‘quvchisiga zotdor it sovg‘a qilgani haqida xabar berilgan edi.