Россия президенти Владимир Путин бошқирдистонлик ўқувчи қизга ўзининг сурати туширилган футболкани совға қилди. «ТАСС» хабарига кўра, саккизинчи синф ўқувчиси ҳисобланган Регина Москвичевага совғани федерал назоратчи Николай Разбежкин топширган.
Оқ футболкага Владимир Путиннинг сурати туширилган бўлиб, сурат остига: «Дўстларни ёлғиз қолдирмайман!», — деб ёзиб қўйилган.
«Бир муддат аввал Регина Владимир Путинга мактуб йўллаб, ундан ўз тасвири туширилган футболка юборишни сўраган эди. Россия президенти маъмурияти Регинанинг мурожаатини кўриб чиқиб, унинг меҳнатсеварлигига эътибор қаратди, кексаларни ҳурмат қилиши, ўз устида ишлаши, эзгу амаллар билан шуғулланиши ва масъулиятли эканлигига ишонч ҳосил қилиб, Бошқирдистон Республикасига посилка юборишга қарор қилди», — дейилади федерал назоратчининг матбуот хизмати хабарида.
Регина Москвичева — аълочи, спортчи, кичик фанлар академиясида «Улуғ Ватан уруши йилларида менинг оилам тарихи» номли тадқиқоти билан биринчи ўринни эгаллаган. Москвичевлар оиласида олти фарзанд бўлиб, Регина энг кенжаси ҳисобланади.
Аввалроқ Россия президенти қирғизистонлик мактаб ўқувчисига зотдор ит совға қилгани ҳақида хабар берилган эди.
Изоҳ (0)