Janubiy Koreya politsiyasi xodimlari AQShning bu mamlakatdagi elchisi Mark Lippertga o‘ldirish haqida tahdid qilingan xabarni Oq uy sayti orqali jo‘natgan 33 yoshli erkakni hibsga oldi. Bu haqda “Renxap” agentligiga tayanib, “RIA Novosti” xabar bermoqda.
Seul politsiyasi vakillarining agentlikka ma’lum qilishicha, ushbu shaxs 14-iyul kuni AQShning Seuldagi elchixonasidan kelib tushgan so‘rovdan so‘ng qo‘lga olingan. Tergov materiallariga ko‘ra, janubiy koreyalik Oq uy saytiga jo‘natgan xabar ingliz tilida yozilgan va ma’no-mantiqsiz jumlalardan iborat bo‘lgan, biroq bunga qo‘shimcha ma’lumotlar oshkor qilinmayapti. Qo‘lga olinganning o‘zi xabarni jo‘natganligini inkor etgan.
Eslatib o‘tamiz, shu yilning 5-mart kuni Mark Lippertga Seul markazida Janubiy Koreya fuqarosi qurolli hujum uyushtirgan, oqibatda elchi og‘ir jarohatlar bilan kasalxonaga yotqizilgan hamda unga 80 ta chok qo‘yilgandi.
Izoh (0)