Yaponiyaning Toshiba Corp. korporatsiyasi 2009–2013-yillar uchun 152 milliard iyena (1,2 milliard dollar) operatsion foydasini hujjatlardagi xatoliklar tufayli hisobdan chiqaradi. Bu haqda Bloomberg ma’lumotlariga tayanib, “Vedomosti” xabar bermoqda.
Shu yil fevralida Yaponiyaning moliyaviy mutasaddilari bosh vazir Sindzo Abe tomonidan boshlangan korporativ boshqaruvni yaxshilashga qaratilgan sa’y-harakatlar doirasida Toshiba’dan o‘tgan yillarning buxgalterlik ma’lumotlarini so‘ragan. Ularni o‘rganish chog‘ida kompaniya bir necha yil davomida daromadi to‘g‘risida oshirib ko‘rsatilgan raqamlarni keltirgani ma’lum bo‘ldi.
Reuters'ning xabar berishicha, Toshiba buxgalteriya ishini tekshirish uchun mustaqil qo‘mita yollagan, uning tekshiruvi natijalari shu haftada taqdim etilishi mo‘ljallangan. Oldinroq yuzaga kelgan vaziyat tufayli Toshiba bosh direktori va prezidenti Xisao Tanaka, direktorlar kengashi raisi o‘rinbosari Norio Sasaki, sobiq prezident Atsutosi Nisida va korporatsiya direktorlar kengashining bir necha a’zolari iste’foga chiqishi ma’lum qilingan edi. Korporatsiya matbuot kotibi esa iste’folar yuzasidan hech qanday qaror qabul qilinmaganini bildirdi.
Kompaniya o‘tkazilayotgan tekshiruv tufayli oxirgi moliyaviy yilning to‘liq hisobotini tuzish va dividendlar to‘lashga imkon bo‘lmayotgani haqida bayonot bergach, Toshiba’ning kapitalizatsiyasi 3,6 milliard dollarga tushib ketdi.
Izoh (0)