Япониянинг Toshiba Cоrp. корпорацияси 2009–2013 йиллар учун 152 миллиард иена (1,2 миллиард доллар) операцион фойдасини ҳужжатлардаги хатоликлар туфайли ҳисобдан чиқаради. Бу ҳақда Bloomberg маълумотларига таяниб, «Ведомости» хабар бермоқда.
Шу йил февралида Япониянинг молиявий мутасаддилари бош вазир Синдзо Абэ томонидан бошланган корпоратив бошқарувни яхшилашга қаратилган саъй-ҳаракатлар доирасида Toshiba’дан ўтган йилларнинг бухгалтерлик маълумотларини сўраган. Уларни ўрганиш чоғида компания бир неча йил давомида даромади тўғрисида ошириб кўрсатилган рақамларни келтиргани маълум бўлди.
Reuters'нинг хабар беришича, Toshiba бухгалтерия ишини текшириш учун мустақил қўмита ёллаган, унинг текшируви натижалари шу ҳафтада тақдим этилиши мўлжалланган. Олдинроқ юзага келган вазият туфайли Toshiba бош директори ва президенти Хисао Танака, директорлар кенгаши раиси ўринбосари Норио Сасаки, собиқ президент Ацутоси Нисида ва корпорация директорлар кенгашининг бир неча аъзолари истеъфога чиқиши маълум қилинган эди. Корпорация матбуот котиби эса истеъфолар юзасидан ҳеч қандай қарор қабул қилинмаганини билдирди.
Компания ўтказилаётган текширув туфайли охирги молиявий йилнинг тўлиқ ҳисоботини тузиш ва дивидендлар тўлашга имкон бўлмаётгани ҳақида баёнот бергач, Toshiba’нинг капитализацияси 3,6 миллиард долларга тушиб кетди.
Изоҳ (0)