Yagona interaktiv davlat xizmatlari portali — My.gov.uz’da Toshkent shahar hokimligining “Toshkent shahri dehqon bozorlarida yoz mavsumida tez buziladigan go‘sht va go‘sht mahsulotlarining savdosini tartibga solish chora-tadbirlari to‘g‘risida” qarori loyihasi muhokama qilinmoqda. Bu haqda UZ24 xabar bermoqda.
Qayd etishlaricha, hujjat Vazirlar Mahkamasining 2015-yil 10-iyuldagi farmoyishiga asosan Toshkent shahar hokimligining Iqtisodiyot va ijtimoiy rivojlantirish masalalari majmuasi, Savdo, xizmat ko‘rsatish sohasi va xalq iste’mol mollari ishlab chiqarish departamenti, Davlat sanitariya-epidemiologiya nazorati markazi, “Toshbozorsavdo” uyushmalarining murojaatini inobatga olgan holda tayyorlangan.
Qaror loyihasida sub go‘sht mahsulotlarini (jigar, ichak, oshqozon, tuyoq, o‘pka, kallapochcha va hokazolar) har yili yoz mavsumida — iyun oyidan oktabr oyiga qadar — bozor hududiga olib kirilishi va savdoga chiqarilishini taqiqlash (maxsus vitrinali muzlatkichlar o‘rnatilgan majmualardan tashqari) ko‘zda tutilgan.
Bundan tashqari, yoz mavsumida sovutgich uskunlari bilan ta’minlanmagan pavilyon va savdo rastalarida jigar, ichak, oshqozon, tuyoq, o‘pka, kallapochcha va hokazolar savdosini ertalab soat 9:00 gacha amalga oshirish, tez buziladigan go‘sht mahsulotlari bilan belgilanmagan joylarda, shu jumladan bozorlar hududidan tashqari joylarda noqonuniy savdo qilish holatlarini oldini olish choralari ko‘rish takliflari kiritilgan.
Izoh (0)