Ягона интерактив давлат хизматлари портали — My.gov.uz’да Тошкент шаҳар ҳокимлигининг «Тошкент шаҳри деҳқон бозорларида ёз мавсумида тез бузиладиган гўшт ва гўшт маҳсулотларининг савдосини тартибга солиш чора-тадбирлари тўғрисида» қарори лойиҳаси муҳокама қилинмоқда. Бу ҳақда UZ24 хабар бермоқда.
Қайд этишларича, ҳужжат Вазирлар Маҳкамасининг 2015 йил 10 июлдаги фармойишига асосан Тошкент шаҳар ҳокимлигининг Иқтисодиёт ва ижтимоий ривожлантириш масалалари мажмуаси, Савдо, хизмат кўрсатиш соҳаси ва халқ истеъмол моллари ишлаб чиқариш департаменти, Давлат санитария-эпидемиология назорати маркази, «Тошбозорсавдо» уюшмаларининг мурожаатини инобатга олган ҳолда тайёрланган.
Қарор лойиҳасида суб гўшт маҳсулотларини (жигар, ичак, ошқозон, туёқ, ўпка, каллапочча ва ҳоказолар) ҳар йили ёз мавсумида — июнь ойидан октябрь ойига қадар — бозор ҳудудига олиб кирилиши ва савдога чиқарилишини тақиқлаш (махсус витринали музлаткичлар ўрнатилган мажмуалардан ташқари) кўзда тутилган.
Бундан ташқари, ёз мавсумида совутгич ускунлари билан таъминланмаган павильон ва савдо расталарида жигар, ичак, ошқозон, туёқ, ўпка, каллапочча ва ҳоказолар савдосини эрталаб соат 9:00 гача амалга ошириш, тез бузиладиган гўшт маҳсулотлари билан белгиланмаган жойларда, шу жумладан бозорлар ҳудудидан ташқари жойларда ноқонуний савдо қилиш ҳолатларини олдини олиш чоралари кўриш таклифлари киритилган.
Изоҳ (0)