Filippin terma jamoasi menejeri Dan Palami hamda bosh murabbiyi Tomas Duley 8-sentabr kuni jahon chempionati saralashining ikkinchi bosqichi doirasidagi O‘zbekiston terma jamoasiga qarshi uchrashuvda jamoani qo‘llab-quvvatlash uchun muxlislarni stadionga chorladi, deb xabar beradi O‘zbekiston futbol federatsiyasi matbuot xizmati.
“Bizga barcha futbol muxlislarining ko‘magi kerak. Hatto futbol fanatlari bo‘lmaganlarni ham 8-sentabr kuni Philippine Sports Stadium’ga kelishlarini va qarsaklari-yu olqishlari bilan futbolchilarimizni eng yaxshi o‘yinlarini namoyish etishga undashlarini so‘raymiz”, — deydi Palami.
“Futbolchilar o‘zlarining eng yuqori darajadagi o‘yinlarini ko‘rsatishlari, gollar urishlari, raqib himoyasiga bosim o‘tkazishlariga turtki bo‘lish uchun muxlislarning hayqiriqlari, stadiondagi jonli muhitning yaratilishidan yaxshiroq usulning o‘zi yo‘q”,— deydi bosh murabbiy Tomas Duley.
Philippine Sports Stadium Filippindagi eng yangi va eng katta futbol o‘yingohi bo‘lib, u o‘z bag‘riga 20 000 muxlisni sig‘dira oladi.
“Filippin terma jamoasi a’zolari jahon chempionati saralashining ikkinchi bosqichini guruhning eng yuqori o‘rinda yakunlashga chog‘langan. Bu bizni jahon chempionatiga yana bir qadam yaqinlashtiradi. Bilaman, bu oson vazifa emas. Biroq biz buni uddalash uchun barcha imkoniyatlarimizni ishga solamiz”, — deydi Filippin terma jamoasi menejeri Dan Palami.
Izoh (0)