“Barselona” klubi va Argentina terma jamoasi hujumchisi Lionel Messi ESPY sovriniga loyiq ko‘rildi. Ushbu sovrin yilning eng yaxshi xorijlik (Shimoliy Amerikadan bo‘lmagan) sportchisiga beriladi, deb xabar qiladi “Uff.uz”.
Shu o‘rinda ta’kidlash lozim, Madridning “Real” klubi hujumchisi Krishtianu Ronaldu bu borada faqat beshinchi o‘rinni egallagan. Lionel Messi o‘tgan mavsum Ispaniya chempionati, mamlakat Kubogi va Chempionlar ligasida g‘olib chiqqan edi. Bundan tashqari, u Argentina terma jamoasi bilan Amerika Kubogi finaliga qadar yetib borgan va Chiliga mag‘lub bo‘lgan.
Messi Ispaniya chempionati va Chempionar ligasida 51 ta o‘yin o‘tkazib, 53 ta gol urgan va 27 ta golli uzatmaga mualliflik qilgan. Amerika Kubogida esa 6 o‘yinda bitta gol urib, 3 ta golli uzatmani amalga oshirdi.
Mukofot uchun tennischi Novak Jokovich, Formula-1 poygachisi Lyuis Xemilton va golfchi Lidiya Ko ham da’vogarlik qilgandi.
Izoh (0)