Saraton kasalligi tashxisi qo‘yilganidan so‘ng, buyuk britaniyalik muhojir o‘zining Kanadadagi uyi yaqinidagi politsiya bo‘linmasiga keldi va 1946-yilda qo‘l urgan qotilligiga iqror bo‘ldi. Bu haqda Evening Standard nashri ma’lumotlariga asosan “RIA Novosti” xabar bergan.
“Ayni paytda 91 yoshda bo‘lgan erkak bundan salkam 70 yil avval, 1946-yilda Londonning Karnabi-strit ko‘chasidagi Blue Lagoon tungi klubida uni pulga chuv tushirmoqchi bo‘lgan yengiltak ayolni to‘pponchadan otib o‘ldirgani haqida ma’lum qilgan. Gap Buyuk Britaniya jinoyatchiligi tarixida jinoyat va uning tan olinishi o‘rtasidagi eng uzoq muddat haqida ketyapti”, — deya ta’kidlaydi gazeta.
Ayni paytda keksalar uyida yashayotgan qariya o‘zining qurboni ismini eslolmadi. Biroq Kanada ma’murlari Skotland-Yard bilan bog‘landi va shundan so‘ng London poytaxt politsiyasi tergovchilari Kanadaga o‘sha yillardagi ochilmagan jinoyatlar haqidagi ma’lumotlar to‘plamini olib keldi. 91 yoshli britaniyalik fotosurat orqali “chaqiruv bo‘yicha qiz” — Margaret Kukni esladi. Uning o‘limi bo‘yicha hech kim javobgarlikka tortilmagandi. Agar uning qotilini o‘shanda topishganda, u o‘lim jazosiga hukm etilishi mumkin edi, chunki Britaniyada 1965-yilga qadar shunday jazo qo‘llanilgan.
Qirollik prokurorlik xizmati Kanadaga jinoyat sodir etgach besh yildan so‘ng mamlakatni tark etgan britaniyalikni yurtiga qaytarish to‘g‘risidagi so‘rov bilan murojaat etdi.
Izoh (0)