Саратон касаллиги ташхиси қўйилганидан сўнг, буюк британиялик муҳожир ўзининг Канададаги уйи яқинидаги полиция бўлинмасига келди ва 1946 йилда қўл урган қотиллигига иқрор бўлди. Бу ҳақда Evening Standard нашри маълумотларига асосан «РИА Новости» хабар берган.
«Айни пайтда 91 ёшда бўлган эркак бундан салкам 70 йил аввал, 1946 йилда Лондоннинг Карнаби-стрит кўчасидаги Blue Lagoon тунги клубида уни пулга чув туширмоқчи бўлган енгилтак аёлни тўппончадан отиб ўлдиргани ҳақида маълум қилган. Гап Буюк Британия жиноятчилиги тарихида жиноят ва унинг тан олиниши ўртасидаги энг узоқ муддат ҳақида кетяпти», — дея таъкидлайди газета.
Айни пайтда кексалар уйида яшаётган қария ўзининг қурбони исмини эслолмади. Бироқ Канада маъмурлари Скотланд-Ярд билан боғланди ва шундан сўнг Лондон пойтахт полицияси терговчилари Канадага ўша йиллардаги очилмаган жиноятлар ҳақидаги маълумотлар тўпламини олиб келди. 91 ёшли британиялик фотосурат орқали «чақирув бўйича қиз» — Маргарет Кукни эслади. Унинг ўлими бўйича ҳеч ким жавобгарликка тортилмаганди. Агар унинг қотилини ўшанда топишганда, у ўлим жазосига ҳукм этилиши мумкин эди, чунки Британияда 1965 йилга қадар шундай жазо қўлланилган.
Қироллик прокурорлик хизмати Канадага жиноят содир этгач беш йилдан сўнг мамлакатни тарк этган британияликни юртига қайтариш тўғрисидаги сўров билан мурожаат этди.
Изоҳ (0)