Ukrainaning Mukachyovo shahrida “O‘ng sektor” a’zolari va militsiya o‘rtasida otishmalar bo‘lib o‘tdi

Ukrainaning Zakarpatskaya viloyati prokuraturasining tergov bo‘limi Mukachyovodagi otishmalar yuzasidan jinoiy tashkilot tuzish va terrorchilik harakatini amalga oshirish holati bo‘yicha tergov boshladi, deya xabar bermoqda “Korrespondent.net”.

Nashr prokuraturaga tayanib eslatishicha, 11-iyul kuni Mukachyovoda “O‘ng sektor” yozuvi tushirilgan ola-bula harbiy kiyimdagi yigirmaga yaqin kishi mahalliy fuqaro bilan oldindan kelishgan holda kafelardan birida uchrashgan. Orada nizo chiqib, ushbu shaxslar o‘qotar quroldan o‘t ocha boshlagan. Voqea joyiga yetib kelgan militsiya xodimlaridan olti kishi, fuqarolardan uch kishi yaralangan. “O‘ng sektor” yozuvi ostidagi qurollangan shaxslar orasida esa besh kishi jabrlangan.

Shundan so‘ng, ola-bula kiyimdagi shaxslar huquq himoyachilari talablarini bajarishdan bosh tortib, Mukachyovo shahri tashqarisiga yo‘naldi va u yerda barrikadalar qurib oldi. Ayni paytda ularni qurolsizlantirish operatsiyasi davom etmoqda.