Avval xabar qilinganidek, O‘zbekiston Respublikasi Prezidenti Islom Karimov 9—10-iyul kunlari Rossiya Federatsiyasining Ufa shahrida Shanxay hamkorlik tashkilotiga a’zo mamlakatlar Davlat rahbarlari kengashining navbatdagi majlisida ishtirok etdi, deb xabar beradi O‘zA.
Sammitning asosiy tadbirlari 10-iyul kuni bo‘lib o‘tdi. ShHTga a’zo mamlakatlar Davlat rahbarlari kengashining majlisi tor doiradagi uchrashuv bilan boshlandi. Unda O‘zbekiston Respublikasi Prezidenti Islom Karimov, Qozog‘iston Respublikasi Prezidenti Nursulton Nazarboyev, Xitoy Xalq Respublikasi Raisi Si Szinpin, Qirg‘iziston Respublikasi Prezidenti Almazbek Atamboyev, Rossiya Federatsiyasi Prezidenti Vladimir Putin, Tojikiston Respublikasi Prezidenti Imomali Rahmon ishtirok etdi.
Majlisda xalqaro va mintaqaviy ahamiyatga molik dolzarb masalalar, ShHTni yanada rivojlantirish istiqbollari yuzasidan fikr almashildi.
Shanxay hamkorlik tashkiloti amaliy muloqot va mintaqaviy hamda global muammolarni samarali hal etish uchun qulay imkoniyat ekani ta’kidlandi.
ShHTga a’zo mamlakatlar davlat rahbarlari majlisni kengaytirilgan tarkibda davom ettirdilar. Unda kuzatuvchi davlatlar rahbarlari, muloqot bo‘yicha sheriklar va xalqaro tashkilotlar vakillari ham ishtirok etdi.
O‘zbekiston Prezidenti Islom Karimov o‘z nutqida tobora global tus olib borayotgan tahdid va xavf-xatarlarga qarshi kurashish, ShHT faoliyatini kengaytirish va takomillashtirish masalalari bo‘yicha o‘z mulohazalarini bildirdi.
“Shiddat bilan o‘zgarib borayotgan hozirgi zamonning dolzarb muammolarini hal qilishda, xavfsizlik, barqarorlik va izchil taraqqiyotni ta’minlashda Shanxay hamkorlik tashkilotining ta’siri va nufuzi oshib bormoqda. Bu ShHTga to‘laqonli a’zo bo‘lish, kuzatuvchilar va muloqot bo‘yicha sheriklar qatoriga qo‘shilish istagini bildirgan davlatlar safi kengayib borayotganida namoyon bo‘lmoqda va bu tabiiy jarayondir”, —dedi Islom Karimov.
O‘zbekiston prezidenti o‘z nutqida Shanxay hamkorlik tashkilotini harbiy-siyosiy alyansga aylantirmaslik, ShHTni tashkil etishdan ko‘zlangan maqsad va prinsiplarga sodiq qolish va ularni yanada mustahkamlash darkorligini ta’kidladi.
O‘zbekiston rahbari Afg‘oniston muammosini harbiy yo‘l bilan hal etib bo‘lmasligini, uning yagona yo‘li – donor mamlakatlarning moliyaviy-iqtisodiy va gumanitar yordamida va BMTning faol ishtirokida faqat tinch siyosiy muzokaralar o‘tkazish, qarama-qarshi tomonlar o‘rtasida o‘zaro kelishuvga erishish ekanini qayd etdi.
O‘zbekiston qo‘shni sifatida Afg‘onistonga muntazam yordam berib kelmoqda, transport kommunikatsiyalarini barpo etish, aholini elektr energiyasi bilan ta’minlash loyihalarini amalga oshirmoqda, insonparvarlik yordamini yetkazib bermoqda.
Ma’lumki, ShHTga raislik O‘zbekistonga o‘tdi. Shu munosabat bilan Islom Karimov O‘zbekiston Respublikasi ShHT tashkil topganining 15-yilligi nishonlanadigan yilda tashkilotga raislik qilishdek mas’uliyatli vazifani zimmasiga olayotganini va bu, o‘z navbatida, istiqbolda ko‘zda tutilgan rejalarni muvaffaqiyatli amalga oshirishda umumiy mas’uliyatni yanada oshirishini ta’kidladi.
Terrorizm, ekstremizm va separatizmga qarshi birgalikda kurashishni kuchaytirishga doir chora-tadbirlar ishlab chiqish, xalqaro va mintaqaviy xavfsizlikka tahdidlarning oldini olish, tashkilotga a’zo davlatlar iqtisodiyotini barqaror yuksaltirish va ularning ijtimoiy taraqqiyotini ta’minlash tashkilot oldidagi dolzarb vazifa bo‘lib qolaveradi.
Mintaqada barqarorlik va taraqqiyotning ishonchli kafolati sifatida ShHT rolini yanada mustahkamlash maqsadida unga a’zo mamlakatlarning o‘zaro hamkorligini kengaytirish, BMT va boshqa xalqaro tashkilotlar, manfaatdor davlatlar bilan munosabatlarni izchil rivojlantirish chora-tadbirlariga alohida ahamiyat beriladi.
“O‘zbekiston ShHTga raisligi doirasida madaniy-gumanitar, ilm-fan va ta’lim sohalarida samarali mintaqaviy hamkorlikni qo‘llab-quvvatlashga doimiy e’tibor qaratadi”, — deb ta’kidladi Islom Karimov.
Sammit yakunida Ufa deklaratsiyasi, ShHTni 2025-yilgacha rivojlantirish strategiyasi va 2016—2018-yillarda terrorizm, separatizm va ekstremizmga qarshi kurashish bo‘yicha hamkorlik dasturi qabul qilindi. Hindiston va Pokistonni ShHTga qabul qilish jarayonini boshlash, Belarus Respublikasiga kuzatuvchi, Ozarbayjon, Armaniston, Kambodja, Nepal davlatlariga muloqot bo‘yicha sherik maqomini berish bo‘yicha qarorlar imzolandi.
Izoh (0)