“Toshkent—O‘sh” avtoyo‘li uchun ajratilgan mablag‘ni o‘zlashtirgan korxona rahbarlari jinoiy javobgarlikka tortildi

“Toshkent — O‘sh” avtomobil yo‘li qurilishi uchun ajratilgan mablag‘ni o‘zlashtirgani uchun, “Olmazor” davlat ta’mir korxonasining ikki rahbari va hisobchisi jinoiy javobgarlikka tortildi, deya xabar bermoqda “Uz24” “Huquq” gazetasiga tayanib.

Pudrat shartnomasiga ko‘ra, korxona ishchilari 12,753 milliard so‘mlik ishlarni bajarishi, ta’mirlanayotgan yo‘llarga 24 santimetr qalinlikdagi beton qoplama to‘shashi kerak edi. Buning o‘rniga, ishchilar zarur bo‘lganidan 4 santimetrga yupqa qoplama to‘shadi, hujjatlarga esa yolg‘on ma’lumotlar kiritildi. Ish 991,533 million so‘mga sifatsiz qilib bajarildi.

Keyinroq hisobchi yordamida soliq qo‘mitasiga 2013-yil yakunlari bo‘yicha qalbaki hisobot topshirildi. Korxona rahbari 17,879 million so‘mlik soliqni to‘lamaganligi ma’lum bo‘ldi.

Aybdorlarning barchasi jinoiy javobgarlikka tortildi.