FIFA reytingida O‘zbekiston 75-o‘ringa tushdi

FIFA rasmiy sayti terma jamoalarning iyun oyi uchun reytingini e’lon qildi, deb xabar beradi O‘zbekiston futbol federatsiyasi matbuot xizmati.

Ushbu reytingga ko‘ra, O‘zbekiston milliy terma jamoasi avvalgi oydagidan bir pog‘ona pastlagan va 75-o‘rindan joy olgan. Ayni paytda O‘zbekiston milliy termasi 453 ochko jamg‘argan.

Osiyo terma jamoalari orasida esa oltinchi o‘rinda bormoqda.

Osiyo qit’asida Eron terma jamoasi birinchi o‘rinda (38-o‘rin), Yaponiya ikkinchi (50), Janubiy Koreya esa uchinchi o‘rinda (52). Osiyo chempioni Avstraliya 59-o‘ringa ko‘tarilib oldi. Umumiy reytingda 69-o‘rinda borayotgan Birlashgan Arab Amirliklari esa Osiyo jamoalari orasida 5-o‘rinni egallab turibdi.

Amerika Kubogi finalchisi Argentina terma jamoasi umumiy ro‘yxatda birinchi o‘ringa chiqib oldi. Undan keyingi o‘rinlarda Germaniya va Belgiya terma jamoalari bormoqda.

Eslatib o‘tamiz, iyun oyida O‘zbekiston milliy termasi o‘rtoqlik o‘yinida Eronga (0:1), JCh—2018 saralash uchrashuvida esa KXDRga (2:4) yutqazdi.