ФИФА рейтингида Ўзбекистон 75-ўринга тушди

ФИФА расмий сайти терма жамоаларнинг июнь ойи учун рейтингини эълон қилди, деб хабар беради Ўзбекистон футбол федерацияси матбуот хизмати.

Ушбу рейтингга кўра, Ўзбекистон миллий терма жамоаси аввалги ойдагидан бир поғона пастлаган ва 75-ўриндан жой олган. Айни пайтда Ўзбекистон миллий термаси 453 очко жамғарган.

Осиё терма жамоалари орасида эса олтинчи ўринда бормоқда.

Осиё қитъасида Эрон терма жамоаси биринчи ўринда (38-ўрин), Япония иккинчи (50), Жанубий Корея эса учинчи ўринда (52). Осиё чемпиони Австралия 59-ўринга кўтарилиб олди. Умумий рейтингда 69-ўринда бораётган Бирлашган Араб Амирликлари эса Осиё жамоалари орасида 5-ўринни эгаллаб турибди.

Америка Кубоги финалчиси Аргентина терма жамоаси умумий рўйхатда биринчи ўринга чиқиб олди. Ундан кейинги ўринларда Германия ва Бельгия терма жамоалари бормоқда.

Эслатиб ўтамиз, июнь ойида Ўзбекистон миллий термаси ўртоқлик ўйинида Эронга (0:1), ЖЧ—2018 саралаш учрашувида эса КХДРга (2:4) ютқазди.