Bugun, 9-iyul kuni O‘FF anjumanlar zalida O‘zbekiston milliy terma jamoasining yangi bosh murabbiyi Samvel Babayan bilan birinchi matbuot anjumani bo‘lib o‘tdi, deb xabar beradi “Championat.asia”.
Dastlab, terma jamoalar markazi rahbari Asqar Tolibjonov so‘z oldi va Deyan Jurjevichning milliy va olimpiya termalarida yordamchi murabbiy bo‘lib ishlashini ma’lum qildi.
“Bir necha kun avval O‘FF ijroqo‘mida milliy va olimpiya terma jamoasiga xorijiy mutaxassisni jalb qilish qarori qabul qilingan edi. Yevropa va Afrika davlatlaridagi mutaxassislarni ko‘rib chiqdik va Deyan Jurjevich nomzodida to‘xtaldik. Bu murabbiy milliy va olimpiya terma jamoasida yordamchi murabbiy etib tayinlandi. Serbiyalik murabbiy bilan 2016-yil 31-mart oyiga qadar shartnoma tuzildi. Bu murabbiy olimpiya terma jamoasini Olimpiada o‘yinlariga chiqishida, milliy terma jamoani Osiyo chempionati final bosqichi va Jahon chempionati final bosqichiga chiqish yo‘lida yordam beradi. Deyan asosan raqiblarni o‘rganishda, terma jamoa murabbiylari bilan o‘z malakasi va tajribasini almashib boradi. Bugun u O‘FF bilan rasman shartnoma tuzdi.
Bosh murabbiy Samvel Babayan oldiga milliy terma jamoa bilan JCh—2018 va OK—2019 final bosqichiga olib chiqish vazifasi qo‘yildi”, — deydi O‘FF terma jamoalar markaziy rahbari Asqar Tolibjonov.
- Terma jamoa rejalari PFL taqvimi bilan mos tushadimi?Samvel Babayan: - PFL rahbarlari bilan bu borada suhbat qurdik. Milliy terma jamoa yig‘inlaridan bir hafta oldin futbolchilarning ixtiyorimizga qo‘shilishiga erishmoqchimiz. Mening taklifim bilan bundan buyon oliy ligada legioner darvozabon o‘ynamaydi. Sababi o‘zimizda ham yaxshi darvozabonlar bor. Ularni maydonga tushirib, imkon berish kerak.
- Yevropadan, Afrikadan murabbiylarni ko‘rib chiqdik dedingiz. Aynan qaysi murabbiylarni nomzodlarini o‘rganib chiqdingiz? Aynan nima uchun Jurjevich nomzodi tanlandi? Asqar Tolibojonov: - Hozir yangi murabbiy oldida familiyalarni aytsam to‘g‘ri bo‘lmasa kerak. Jurjevich ushbu murabbiylar bilan birga ishlagan, bundan tashqari, u ozmi-ko‘pmi rus tilini biladi. Shu va boshqa jihatlari tufayli serbiyalik mutaxassisni tanladik.
- Kuchli raqiblar bilan ham o‘rtoqlik uchrashuvlari o‘tkaziladimi? Samvel Babayan: - Kuchli raqiblar bilan o‘yin o‘tkazishni istaymiz. Ammo maqsad kuchli raqib bilan o‘ynash emas saralashdagi raqiblarimizga o‘xshaydigan jamoalar bilan o‘ynashimiz kerak. Bir soat oldin O‘FF prezidenti bilan gaplashdik. Mirabror Usmonov barcha kerakli sharoitlarni yaratib berayaptilar.
- Sizni oldingizga katta vazifalar qo‘yilgan. Umuman olimpiya terma jamoasiga kerakli kadrlarni tanlashda sizga muammo bo‘lmaydimi?Viktor Jalilov: - Olimpiya terma jamoasiga yaxshi va kuchli futbolchilarni jalb etamiz. Oldimizda katta tanlov bor. Barcha nomzodlarni diqqat bilan kuzatamiz va munosiblarini olimpiya terma jamoasiga jalb etamiz. Yosh iste’dodli futbolchilar ko‘p, biroq yoshlar tez-tez o‘zgarib turadi. Shu bois bu borada barcha jihatlarni e’tiborga olamiz. Aslida mendan oldingi murabbiylar katta hajmdagi ishni olib borishgan. Iyul oyidagi yig‘inimizga bir qator yangi futbolchilarni chaqirdik. Klublarida zaxirada qolib ketayotgan ba’zi futbolchilarga ham imkon beramiz. Hozir kengaytirilgan ro‘yxatimizda 50 nafar futbolchi bor.
- Igor Sergeyev bu yil asosiy e’tiborini milliy terma jamoaga qaratadimi yoki olimpiya terma jamoasigami? Samvel Babayan: - Sergeyev milliy terma jamoaning asosiy hujumchisi. Olimpiya terma jamoasida dekabr oyida yig‘in o‘tkazadi va yanvar oyida Qatardagi Osiyo chempionatida ishtirok etadi. Iyul oyidagi yig‘inga bir qator hujumchilarni jalb qildik. Geynrix, Abduxoliqov kabi hujumchilarni sinab ko‘rish rejamizda bor.
- Bir necha yillardan buyon terma jamoalarning uzoq muddatli yig‘inlari tufayli futbolchilar klublaridan uzoqlashib ketdi va hatto “yo‘qolib qoldi”...Asqar Tolibjonov: - To‘g‘ri gapirdingiz. Terma jamoa yig‘ini FIFA kunlarida bo‘lib o‘tadi. Futbolchilar ko‘proq o‘z klublari ixtiyorida bo‘ladi.
- 11-iyuldan yig‘in boshlanar ekan. O‘yinlar qachon va qayerda bo‘lishini ayta olasizmi? Asqar Tolibjonov: - Milliy va olimpiya terma jamoamiz 19—26-iyul kunlari yig‘in o‘tkazadi. 22 va 25-iyul kunlari o‘zaro o‘yin o‘tkaziladi. Birinchi o‘yin “Jar” stadionida, ikkinchi bahs “Paxtakor” stadionida bo‘lib o‘tadi.
- O‘zbekistonga hush kelibsiz. O‘zbekiston futbolining kelajagi haqida nima deya olasiz? Deyan Jurjevich : - Bu yerda o‘tirganimdan baxtiyorman. Samvel Babayanga taklif uchun rahmat aytaman. Men o‘z do‘stlarim yoniga qaytdim. Bu eng muhimi. O‘zbekiston futboliga yordam berish uchun keldim, bu davlatni juda yaxshi bilaman. Buxoro va Samarqandni ko‘rib bo‘lganman, turist sifatida emas ishlash uchun keldim. Sizlarda juda ko‘plab yosh va qobiliyatli futbolchilar bor. Babayan qanday murabbiy ekanini va qanday talabchan ekanini yaxshi bilaman. Milliy terma jamoa uchun barcha birlashib ishlashi kerak. Men milliy, olimpiya va yoshlar terma jamoalarida ishlab, bog‘lovchilik qilmoqchiman. Bu borada Serbiyada ham ishlaganman.
- Terma jamoa tarkibida katta o‘zgarishlar qilinadimi yoki tajribali futbolchilardan xizmatidan voz kechmaysizmi?Samvel Babayan: - Bugun ixtiyorimizdagi jamoa O‘zbekiston tarixida eng kuchli terma jamoa, deya olaman. Bu jamoa bilan barcha istayotgan maqsadga erishish mumkin. Katta o‘zgarishlar bo‘lmaydi, sababi tajribali futbolchilar yoshlarga o‘rnak bo‘lishi kerak. Navbatdagi yig‘inga 4 nafar yoshlar terma jamoasidan futbolchi chaqirganmiz. Ular asta sekin milliy terma jamoa havosidan nafas olib borishi kerak.
Deyan Jurjevich: - Serbiya yoshlar o‘rtasidagi Jahon chempioni bo‘ldi. Sababi bolalar futboliga e’tibor katta bo‘ldi. O‘zbekistonda ham multi-tizimni ishga tushirib olish kerak. Buni qanchalik tez qilsak shuncha yaxshi.
- MTJ va OTJ murabbiylar shtabi vakillari nomi aniq bo‘ldimi yoki yana o‘zgartirishlar bo‘ladimi?Asqar Tolibjonov: - Barcha terma jamoalar murabbiylar shtabi shakllantirildi. Murabbiylar nomi ma’lum. Bosh murabbiy o‘zi istagan yordamchilarga ega bo‘ldi. Endi terma jamoaning texnik guruhi kengaydi. Milliy terma jamoada bosh murabbiy Samvel Babayan, katta murabbiy Ravshan Haydarov, yordamchi murabbiy Deyan Jurjevich, darvozabonlar murabbiyi Anvar Rashidov, jismoniy tayyorgarlik bo‘yicha murabbiy Andrey Shipilov.
- O‘zbekiston milliy terma jamoasining yangi o‘yin uslubi, falsafasi qanday bo‘ladi? Samvel Babayan: - Klubda ma’lum falsafani kiritish osonroq. Terma jamoada esa futbolchilar kamroq bo‘ladi. Jamoa raqobatbardosh bo‘lishi, bir qator taktik sxemalarga ega bo‘lishi kerak. Bizning uslubimiz bitta bo‘ladi — natijaga va g‘alabaga erishish. Barchamiz terma jamoaning Jahon chempionatiga chiqishni istaymiz, shu maqsad, shu orzu yo‘lida birlashib ishlashimiz lozim. Terma jamoaga kelgan barcha futbolchilar jonini berib o‘ynaydi, har xil gaplarga e’tibor qilmang. Har bir futbolchi vatanparvar. Milliy terma jamoada oilaviy muhit yaratishni maqsad qilganman. “Hamma bir kishi uchun, bir kishi hamma uchun” — bu bizning shiorimiz bo‘ladi. Xudo nasib qilsa, Jahon chempionatiga yo‘llanma olamiz.
- Sizni juda tajribali murabbiy sifatida bilamiz. Ammo so‘nggi yillarda bosh murabbiy bo‘lib ishlamadingiz. Bu sizga ta’sir qilmaydimi? Viktor Jalilov: - Buni natijalar ko‘rsatib beradi. Bosh murabbiy bo‘lib faoliyat olib bormagan bo‘lsam ham klubda maslahatchi murabbiy sifatida ishladim. Olimpiya terma jamoasining potensiali juda yuqori. Ularga ko‘proq e’tibor qilsak biz ham qo‘yilgan vazifani bajara olamiz.
Izoh (0)