“Sen yolg‘iz emassan” fondining taklifiga binoan Fransiyaning “Umid rishtalari” shifokorlar uyushmasi a’zolari tibbiy tekshiruv, maslahat va jarrohlik muolajalarini bajarishdan iborat xayriya aksiyasida ishtirok etish uchun shu hafta akademik V.V. Vohidov nomidagi Respublika ixtisoslashtirilgan jarrohlik markaziga tashrif buyurdi, deb xabar qiladi “12news.uz”.
“Umid rishtalari” uyushmasi 400 ta shifokordan iborat bo‘lib, ular, mana, 27 yildirki dunyo davlatlari bo‘ylab o‘z malakalari bilan o‘rtoqlashib kelmoqda. Bu tashkilot bolalar jarrohligi sohasida yiliga 30 ta mamlakatda 5000 dan ziyod operatsiyalarni o‘tkazadi.
Mazkur aksiyaga bag‘ishlangan brifing-uchrashuvda Respublika ixtisoslashtirilgan jarrohlik markazining direktori Feruz Nazirov, O‘zbekistonning YuNESKOdagi doimiy vakili, “Sen yolg‘iz emassan” xayriya fondi va Respublika bolalar ijtimoiy moslashuvi markazi Vasiylik kengashlarining raisi Lola Karimova-Tillyayeva, bolalar visseral jarrohi professor Per Xelardo, professor Olive Baron, anesteziolog Katrin Amreyn hamda jarrohlik markazining mutaxassislari ishtirok etdi.
“Umid qilamanki, hamkorligimiz O‘zbekistonda bolalar kardio-jarrohligini o‘z vaqtida rivojlanishi uchun turtki bo‘lib xizmat qiladi”, – deya ta’kidlab o‘tdi o‘z ma’ruzasida Lola Karimova-Tillyayeva.
Tashrif chog‘ida fransiyalik shifokorlar kam ta’minlangan oila farzandlarini, Mehribonlik uylari tarbiyalanuvchilarini hamda Respublika bolalar ijtimoiy moslashuvi markazidagi imkoniyati cheklangan bolalarni, jami qirqqa yaqin bolani ko‘rikdan o‘tkazib, ularga tibbiy maslahat berdi.
Tibbiy ko‘rikdan o‘tgan bolalarning sog‘lig‘ini inobatga olgan holda shifokorlar farg‘onalik ikki yoshli Ismoilova Mubinaga jarrohlik muolajasini o‘tkazishga qaror qildi.
Shu bilan birga uyushma vakillari mahalliy jarrohlar uchun ma’ruza va treninglar o‘tkazdi.
Izoh (0)