«Сен ёлғиз эмассан» фондининг таклифига биноан Франциянинг «Умид ришталари» шифокорлар уюшмаси аъзолари тиббий текширув, маслаҳат ва жарроҳлик муолажаларини бажаришдан иборат хайрия акциясида иштирок этиш учун шу ҳафта академик В.В. Воҳидов номидаги Республика ихтисослаштирилган жарроҳлик марказига ташриф буюрди, деб хабар қилади «12news.uz».
«Умид ришталари» уюшмаси 400 та шифокордан иборат бўлиб, улар, мана, 27 йилдирки дунё давлатлари бўйлаб ўз малакалари билан ўртоқлашиб келмоқда. Бу ташкилот болалар жарроҳлиги соҳасида йилига 30 та мамлакатда 5000 дан зиёд операцияларни ўтказади.
Мазкур акцияга бағишланган брифинг-учрашувда Республика ихтисослаштирилган жарроҳлик марказининг директори Феруз Назиров, Ўзбекистоннинг ЮНЕСКОдаги доимий вакили, «Сен ёлғиз эмассан» хайрия фонди ва Республика болалар ижтимоий мослашуви маркази Васийлик кенгашларининг раиси Лола Каримова-Тилляева, болалар висцерал жарроҳи профессор Пьер Хелардо, профессор Оливье Барон, анестезиолог Катрин Амрейн ҳамда жарроҳлик марказининг мутахассислари иштирок этди.
«Умид қиламанки, ҳамкорлигимиз Ўзбекистонда болалар кардио-жарроҳлигини ўз вақтида ривожланиши учун туртки бўлиб хизмат қилади», – дея таъкидлаб ўтди ўз маърузасида Лола Каримова-Тилляева.
Ташриф чоғида франциялик шифокорлар кам таъминланган оила фарзандларини, Меҳрибонлик уйлари тарбияланувчиларини ҳамда Республика болалар ижтимоий мослашуви марказидаги имконияти чекланган болаларни, жами қирққа яқин болани кўрикдан ўтказиб, уларга тиббий маслаҳат берди.
Тиббий кўрикдан ўтган болаларнинг соғлиғини инобатга олган ҳолда шифокорлар фарғоналик икки ёшли Исмоилова Мубинага жарроҳлик муолажасини ўтказишга қарор қилди.
Шу билан бирга уюшма вакиллари маҳаллий жарроҳлар учун маъруза ва тренинглар ўтказди.
Изоҳ (0)