Tunis fuqarosi Italiyada 2013-yili O‘rtayer dengizida 366 nafar muhojirning cho‘kib ketishiga sabab bo‘lgan xatti-harakatlari uchun 18 yillik qamoq jazosiga hukm qilindi. Palermo sudi 2-iyul, chorshanba kuni shunday hukm chiqardi, deya xabar bermoqda “TASS”.
Italiyada bunday jinoyat uchun 20 yildan ziyod vaqtga ozodlikdan mahrum etish jazosi qo‘llaniladi, ammo sud 36 yoshli Xolid bin Salom aybini tan olganligi va sud jarayonining tezlashtirilgan holatda ko‘rib chiqilganini inobatga olib, jazoni yengillashtirdi.
Shu yil boshidan beri Italiyani Shimoliy Afrika sohillaridan ajratib turuvchi Sitsiliya bo‘g‘ozida qutqarib qolingan qochoqlar soni 60 ming kishiga yaqinlashmoqda. Mamlakatda noqonuniy muhojirlarni qabul qilish bilan bog‘liq favqulodda vaziyat saqlanib turibdi.
Italiya va Gretsiyaga O‘rtayer dengizi orqali kirib kelgan muhojirlarni Yevropa Ittifoqi davlatlari o‘rtasida taqsimlash kvotalari to‘g‘risidagi masala 25-iyunda Bryusselda ochilgan YeI sammitida ko‘tarilgan, ammo muhokamalar Italiya kutgan natijalarni keltirmagan edi.
Yevrokengash rahbari Donald Tusk Yevroittifoq yaqin ikki yil mobaynida 60 ming muhojirni hamjamiyatning boshqa mamlakatlari o‘rtasida taqsimlashga rozi ekanligi, ammo bu jarayon aynan qanday amalga oshirilishi hozircha mavhum bo‘lib turganini bayon qilgan. Shu oy oxirlarida bu boradagi aniq choralar ko‘rilishi kutilmoqda.
Izoh (0)