Тунис фуқароси Италияда 2013 йили Ўртаер денгизида 366 нафар муҳожирнинг чўкиб кетишига сабаб бўлган хатти-ҳаракатлари учун 18 йиллик қамоқ жазосига ҳукм қилинди. Палермо суди 2 июль, чоршанба куни шундай ҳукм чиқарди, дея хабар бермоқда «ТАСС».
Италияда бундай жиноят учун 20 йилдан зиёд вақтга озодликдан маҳрум этиш жазоси қўлланилади, аммо суд 36 ёшли Холид бин Салом айбини тан олганлиги ва суд жараёнининг тезлаштирилган ҳолатда кўриб чиқилганини инобатга олиб, жазони енгиллаштирди.
Шу йил бошидан бери Италияни Шимолий Африка соҳилларидан ажратиб турувчи Сицилия бўғозида қутқариб қолинган қочоқлар сони 60 минг кишига яқинлашмоқда. Мамлакатда ноқонуний муҳожирларни қабул қилиш билан боғлиқ фавқулодда вазият сақланиб турибди.
Италия ва Грецияга Ўртаер денгизи орқали кириб келган муҳожирларни Европа Иттифоқи давлатлари ўртасида тақсимлаш квоталари тўғрисидаги масала 25 июнда Брюсселда очилган ЕИ саммитида кўтарилган, аммо муҳокамалар Италия кутган натижаларни келтирмаган эди.
Еврокенгаш раҳбари Дональд Туск Евроиттифоқ яқин икки йил мобайнида 60 минг муҳожирни ҳамжамиятнинг бошқа мамлакатлари ўртасида тақсимлашга рози эканлиги, аммо бу жараён айнан қандай амалга оширилиши ҳозирча мавҳум бўлиб турганини баён қилган. Шу ой охирларида бу борадаги аниқ чоралар кўрилиши кутилмоқда.
Изоҳ (0)