Komik aktyor Jim Kerri maktab o‘quvchilari uchun majburiy vaksinatsiyani joriy etgan Kaliforniya gubernatori Jerri Braunni tanqid qilib, uni “korporativ fashist” deb atadi. Bu haqda aktyor Twitter’dagi sahifasida xabar qoldirgan.
“Kaliforniya gubernatori tarkibida simob va alyuminiy bo‘lgan vaksinalar bilan bolalarni zaharlashga ‘Ha’ deb javob berdi. Bu korporativ fashistni to‘xtatib qolish kerak”, - deb yozdi aktyor.
Kerrining qo‘shimcha qilishicha, u bunday emlashga qarshi emas, faqatgina dori vositalarida tiomersal nomi ostida ishlatiladigan simobning metallorganik birikmalaridan foydalanishni to‘liq taqiqlash tarafdori xolos.
Gubernator Braun tomonidan ma’qullangan qonunga ko‘ra, 2016-yildan Kaliforniyaning barcha jamoatchilik maktablari o‘quvchilari emlash jarayonidan o‘tishi kerak. Qonunning avvalgi tahririda o‘quvchi diniy e’tiqodidan kelib chiqib emlashdan bosh tortishi mumkin edi.
Vaksinalarning sifatini saqlab qolish maqsadida ularda tiomersaldan foydalaniladi. AQShda amal qilayotgan qonunga muvofiq, olti yoshgacha bo‘lgan bolalarga mo‘ljallangan dorilarda mazkur modda miqdori bir mikrogrammdan oshmasligi kerak. Katta yoshdagi bolalar dorilari uchun hozircha bunday cheklovlar yo‘q.
Tiomersalning zararli ekani haqidagi bahs-munozaralarga qaramay, tadqiqotlar hozircha vaksinalarda ishlatilayotgan miqdor moddaning zaharli bo‘lishiga sabab bo‘lishi haqidagi axborotni tasdiqlamayapti. Shuningdek, tiomersal autizmga olib kelishi to‘g‘risidagi mish-mishlar ham tasdiqlanmagan.
Izoh (0)