Forbes jurnali AQShning eng badavlat sulolalari yillik reytingini e’lon qildi. RBC.ru xabariga ko‘ra, ro‘yxatda birinchi o‘rinni Walmart do‘konlar tarmog‘i asoschisi hisoblangan Uoltonlar oilasi egallagan.
Walmart’ning olti merosxo‘ri xalqaro reteylerning 54 foiziga egalik qiladi. Forbes ularning boyligini 149 milliard dollarga baholadi.
Undan keyingi o‘rinni Kox oilasi egallagan. AQShning eng yirik ikkinchi xususiy kompaniyasi hisoblangan Koch Industries’ning egalari 86 milliard dollar boylikka ega. Korporatsiya ishlab chiqarish, savdo, investitsiyalar, neftni qayta ishlash va kimyoviy ishlab chiqarish bilan shug‘ullanadi.
Reytingda uchinchi o‘rinni Mars oilasi egallagan. Jahondagi eng yirik qandolat kompaniyasi egasining boyligi 80 milliard dollarga baholanmoqda.
Umuman, AQShning eng badavlat oilalari ro‘yxatidan 193 sulola o‘rin olgan. Har birining boyligi kamida 1,2 milliard dollarga teng. Eng badavlat sulolalarning umumiy boyligini Forbes 1,3 trillion dollarga baholadi.
Izoh (0)