Toshkentning “Lokomotiv” klubi xalqaro maydonda o‘zbek futboli mavqeini yuksaltirish, o‘sib kelayotgan yosh avlodga zamonaviy futbol bo‘yicha ko‘nikmalarni o‘rgatish maqsadida joriy yildan boshlab Angliyaning “Flitvud Taun” jamoasi bilan hamkorlikni yo‘lga qo‘ydi, deb xabar beradi “O‘zA”.
O‘zbekiston futbol federatsiyasida “Lokomotiv” jamoasi va “Flitvud Taun” klubi rahbarlari o‘rtasidagi kelishuv yuzasidan matbuot anjumani bo‘lib o‘tdi. Unda mazkur hamkorlik, ikki davlat o‘rtasidagi hamjihatlikni sport orqali yanada mustahkamlash istiqbollari haqida so‘z yuritildi.
– Ushbu hamkorlikdan ko‘zlangan asosiy maqsadimiz har ikkala klubdagi yosh iste’dodli futbolchilarni tarbiyalash va o‘zaro tajriba almashishdan iborat, – deydi “Flitvud Taun” klubi bosh direktori Stiv Kurvuud. – “Lokomotiv” jamoasi biz uchun mos hamkor jamoadir. O‘ylaymanki, hamkorligimiz o‘z samarasini beradi.
Shu yilning avgust oyidan boshlab har yili “Lokomotiv”ning yoshlar jamoasi a’zolari va 20 yoshgacha bo‘lgan iste’dodli futbolchilari Angliyada yetakchi mutaxassislar rahbarligida o‘z mahoratini oshirish bo‘yicha amaliy mashg‘ulotlarda ishtirok etadi. Shuningdek, Angliya jamoasi yoshlari ham O‘zbekistonga kelib, “temiryo‘lchilar” o‘rinbosarlari va yoshlar jamoasida tajriba almashadi.
Hamkorlik doirasida chet eldan futbol mutaxassislarini jalb etish, o‘zbekistonlik yoshlarga futbol sirlari, hakamlik, torf (maydon) boshqaruvchisi, futbol fotoreportyori va boshqa bir necha yo‘nalishda maxsus seminarlar tashkil qilish ko‘zda tutilgan.
Shu yilning mart oyida “Lokomotiv” vakillari Angliyada bo‘lib, futbol infratuzilmasi, yoshlar akademiyasi va Yevropa futbolidagi o‘zgarishlar bilan yaqindan tanishgan edi. Hamkorlik asosida keyingi yildan boshlab ikki jamoa o‘rtasida o‘rtoqlik uchrashuvlarini o‘tkazish ham rejalashtirilgan.
Izoh (0)