Тошкентнинг «Локомотив» клуби халқаро майдонда ўзбек футболи мавқеини юксалтириш, ўсиб келаётган ёш авлодга замонавий футбол бўйича кўникмаларни ўргатиш мақсадида жорий йилдан бошлаб Англиянинг «Флитвуд Таун» жамоаси билан ҳамкорликни йўлга қўйди, деб хабар беради «ЎзА».
Ўзбекистон футбол федерациясида «Локомотив» жамоаси ва «Флитвуд Таун» клуби раҳбарлари ўртасидаги келишув юзасидан матбуот анжумани бўлиб ўтди. Унда мазкур ҳамкорлик, икки давлат ўртасидаги ҳамжиҳатликни спорт орқали янада мустаҳкамлаш истиқболлари ҳақида сўз юритилди.
– Ушбу ҳамкорликдан кўзланган асосий мақсадимиз ҳар иккала клубдаги ёш истеъдодли футболчиларни тарбиялаш ва ўзаро тажриба алмашишдан иборат, – дейди «Флитвуд Таун» клуби бош директори Стив Курвууд. – «Локомотив» жамоаси биз учун мос ҳамкор жамоадир. Ўйлайманки, ҳамкорлигимиз ўз самарасини беради.
Шу йилнинг август ойидан бошлаб ҳар йили «Локомотив»нинг ёшлар жамоаси аъзолари ва 20 ёшгача бўлган истеъдодли футболчилари Англияда етакчи мутахассислар раҳбарлигида ўз маҳоратини ошириш бўйича амалий машғулотларда иштирок этади. Шунингдек, Англия жамоаси ёшлари ҳам Ўзбекистонга келиб, «темирйўлчилар» ўринбосарлари ва ёшлар жамоасида тажриба алмашади.
Ҳамкорлик доирасида чет элдан футбол мутахассисларини жалб этиш, ўзбекистонлик ёшларга футбол сирлари, ҳакамлик, торф (майдон) бошқарувчиси, футбол фоторепортёри ва бошқа бир неча йўналишда махсус семинарлар ташкил қилиш кўзда тутилган.
Шу йилнинг март ойида «Локомотив» вакиллари Англияда бўлиб, футбол инфратузилмаси, ёшлар академияси ва Европа футболидаги ўзгаришлар билан яқиндан танишган эди. Ҳамкорлик асосида кейинги йилдан бошлаб икки жамоа ўртасида ўртоқлик учрашувларини ўтказиш ҳам режалаштирилган.
Изоҳ (0)