Armaniston politsiyasi elektr energiya tariflari oshishiga qarshi norozilik namoyishi qatnashchilariga qarshi kuch ishlatish niyatida emas. Bu haqda mamlakat politsiyasi boshlig‘i, general-leytenant Vladimir Gasparyan ma’lum qildi, deya xabar bermoqda “TASS”.
Uning so‘zlariga ko‘ra, “huquqbuzarliklar bo‘lmas ekan, politsiya hech qanday chora ko‘rmaydi”. “Huquqbuzarlik bo‘lsa – biz jamoat tartibini o‘rnatamiz”, - dedi bosh politsiyachi. Gasparyanning qayd etishicha, “qoidabuzarlik bo‘lsa, u birinchi galda namoyish ishtirokchilari xavfsizligi uchun buning oldini olishga majbur”. Politsiya rahbari “kuch ishlatishga zarurat bo‘lmasligiga ishonchi komil” ekanligini aytdi.
17-iyun kuni Armaniston jamoat xizmatlari ko‘rsatishni tartibga solish komissiyasi “Armaniston elektr tarmoqlari” taqsimlovchi kompaniyasi arizasini ko‘rib chiqib, 1-avgustdan elektr energiya tariflarini 16 foizga oshirish haqidagi iltimosni qisman qondirdi. Shu kunning o‘zida poytaxt Yerevan markazida bu qarorga qarshi norozilik namoyishi bo‘lib o‘tdi. 19-iyun kuni Armanistonning boshqa yirik shaharlarida ham shunday namoyishlar takrorlandi.
23-iyun kuni politsiya poytaxtdagi namoyish ishtirokchilarini tarqatish uchun kuch ishlatib ko‘rdi. Natijada 18 kishi, jumladan, 11 politsiyachi jabrlandi, 237 kishi hibsga olinib, keyinchalik ular qo‘yib yuborildi. 25-iyun kuni Armaniston bosh vaziri Ovik Abramyan elektr energiya tariflari oshishi munosabati bilan kam ta’minlangan oilalarga tovon puli to‘lanishi haqidagi qaror haqida e’lon qildi, biroq shunga qaramay Yerevan va boshqa shaharlardagi namoyishlar to‘xtamayapti.
Izoh (0)