Yetti kishi bo‘lib o‘ynagan Avstriya klubi 42 ta to‘p o‘tkazib yubordi

Avstriyaning futbol bo‘yicha sakkizinchi ligasida kamyob hisob qayd etildi, deb xabar qiladi “Korrespondent.net”.

“Untervaltersdorf” klubi yuqori divizionga chiqishi uchun so‘nggi turda 47 ta to‘p kiritishi kerak edi. Jamoa bu vazifani deyarli bajarishga erishdi.

“Untervaltersdorf”ning raqibi yaqqol autsayder hisoblangan “Medling” klubi bo‘ldi. Bu jamoa 25 o‘yinda 2 ochko to‘plab, 181 ta to‘p o‘tkazib yuborgandi. Buning ustiga klub bu bahsga 7 kishi bo‘lib tashrif buyurdi. “Medling”ning darvozasiga hujumchilardan biri turdi, jamoaning 50 yoshli bosh murabbiyi ham maydonda to‘p surishiga to‘g‘ri keldi.

Birinchi taymda “Untervaltersdorf” 19 ta, tanaffusdan keyin esa yana 23 ta to‘p kiritdi. Yakuniy hisob 42:2 bo‘ldi, ammo bu “Untervaltersdorf”ning yuqori divizionga chiqishiga kamlik qildi.