Farg‘ona shahridagi “Istiqlol” tennis kortlarida xotin-qiz tennischilar o‘rtasidagi turnirning asosiy to‘r bahslari davom etyapti. Mukofot jamg‘armasi 25 ming dollardan iborat musobaqada 17-iyun kuni ikkinchi davra ishtirokchilari ma’lum bo‘ldi, deb xabar qiladi “Olamsport.com”.
O‘zbekistonlik tennischilardan faqat ikki nafarigina ikkinchi davra yo‘llanmasini qo‘lga kiritdi. Qolganlar mag‘lubiyat alamini totib ko‘rdi. Turnirda uchinchi raqam ostida tasniflangan Sabina Sharipova yana bir o‘zbekistonlik Albina Xabibulinani ortiqcha qiyinchiliksiz 6:0, 6:1 hisobida taslim etdi.
Asosiy to‘rga imtiyozli ravishda qo‘yilgan Go‘zal Yusupova esa saralash bahslari g‘olibalaridan biri qozog‘istonlik Aleksandra Grinchishinani 4:6, 6:4, 6:3 hisobida yengdi. Vlada Yakshibarova, Sarvinoz Saidxo‘jayeva, Kamola Umarova va Shahnoza Xotamova raqibalaridan mag‘lub bo‘lib, yakkalikdagi ishtirokini muddatidan ancha avval yakunladi.
Izoh (0)