Argentinalik ishbilarmon Alexandro Bursako Italiya politsiyasiga taslim bo‘ldi. “RIA Novosti” xabariga ko‘ra, u FIFAdagi korrupsiya mojarosi ishtirokchilaridan biridir va AQSH Adliya vazirligi tomonidan unga qarshi ayblov e’lon qilingan.
Trentino politsiyasi rahbari Juzeppe Rikarioning ma’lum qilishicha, Bursako seshanba kuni ikki advokati hamrohligida politsiya bo‘linmasiga kelgan va politsiya xodimlari tomonidan hibsga olingan.
27-may kuni FIFAning bir qator amaldorlari korrupsiya gumoni bilan Syurixda hibsga olingani ma’lum bo‘lgandi. AQSH bosh prokurori jahon futbolining bosh tashkilotida so‘nggi yigirma yildan beri korrupsiya “gullab-yashnagani”, shuningdek, firibgarlik, reket va pul yuvish kabi jinoyatlar sodir etilganini ma’lum qilgandi.
Avalroq Bursako Syurixda hibsga olinishdan qutilib qolgani haqida xabar berilgan edi. Argentina soliq xizmati esa Torneos y Competencias kompaniyasi prezidenti hisoblangan Bursakoni soliq to‘lovlaridan bo‘yin tovlashda ayblab chiqqandi.
Izoh (0)