O‘zbekiston chempionatida qizil kartochka olgan futbolchilarning litsenziyasi olib qo‘yiladi

O‘zbekiston Professional futbol Ligasi yangi bir qoidani joriy qildi. Unga ko‘ra bundan buyon chempionat bahslarida qizil kartochka bilan jazolangan futbolchilarning litsenziyasi hakamlar tomonidan olib qo‘yiladi, deb xabar beradi “Arena.uz”.

Futbolchining maydonga tushishiga ruxsat beruvchi mazkur litsenziya har doim klubda bo‘ladi. Murabbiylar har bir uchrashuvdan oldin ushbu hujjatni hakamlar brigadasiga ko‘rsatishi kerak. Endilikda futbolchi qizil kartochka olsa, hakamlar o‘sha futbolchining litsenziyasini klubdan olib PFLga topshiradi. PFL esa o‘z navbatida futbolchi jazo muddatini o‘tab bo‘lgach litsenziyani klubga yana qaytarib beradi.

“Katta ehtimol bilan ushbu qoida PFL klublarning manfaatini o‘ylagani uchun joriy qilingan. Sababi avvallari futbolchi uchrashuvda qizil kartochka olsa, PFL futbolchiga nechta o‘yinda maydonga tushish taqiqlanganini salkam ikki haftadan keyin ma’lum qilardi. Tabiiyki, klublar jazo muddati e’lon qilinavermagach futbolchini maydonga tushirib, keyin buning uchun jazo olishga majbur bo‘lishardi. Qabul qilingan yangi qoida aynan ushbu holatga chek qo‘yadi”, — deyiladi “Arena.uz” saytida.