FIFA sobiq vitse-prezidenti Jek Uorner Gaiti 2010-yili yuz bergan vayronkor zilzila oqibatlarini bartaraf etish uchun ajratilgan mablag‘larni o‘zlashtirganlikda gumon qilinmoqda. Meduza.io’ning xabar berishicha, AQSH ma’muriyati mazkur yo‘nalishda tegishli tergov harakatlarini olib bormoqda.
Jinoyat ishi materiallarida qayd etilishicha, FIFA va Janubiy Koreya futbol assotsiatsiyasi tomonidan Gaitidagi zilzila jabrlanuvchilari uchun ajratilgan 750 ming dollar miqdoridagi mablag‘ Uorner nazoratidagi hisob-raqamlarga qayta yo‘naltirilgan va uning shaxsiy ehtiyojlari uchun sarflab yuborilgan.
Ayni damda Uorner Trinidad va Tobagodan AQSHga ekstraditsiya etilishini kutmoqda, AQSHda u korrupsiya ayblovi bo‘yicha sud oldida chiqish qiladi. U o‘ziga qarshi ilgari surilgan barcha ayblovlarni inkor etmoqda.
Ma’lumot uchun, Jek Uorner FIFAdagi korrupsiya ishi bo‘yicha AQSH tomonidan olib borilayotgan tergov harakatlarida eng asosiy ayblanuvchilardan biridir. Xususan, uni 10 million dollar miqdoridagi mablag‘ni talon-taroj etganlikda gumon qilishmoqda. Umuman, mazkur ish bo‘yicha FIFAning jami 14 mansabdori gumon ostiga olingan.
Izoh (0)