Xitoyning Shenyan shahrida istiqomat qiluvchi Gan familiyali shaxs qiymati 660 ming yuan (106 ming dollar) bo‘lgan avtomobilni faqat chaqa pullar evaziga sotib oldi. Bu haqda Shanghaiist xabar bermoqda.
Xitoylik xaridor avtosalonga umumiy og‘irligi to‘rt tonna, jami 1320 xaltachaga solingan tangalarni yuk mashinasida olib kelgan. Pullarni do‘konga olib kirish uchun 10 nafar sotuvchi jalb etilgan. Avtosalon ichida tangalardan balandligi to‘rt metr bo‘lgan “tog‘” bunyod etilgan. Avtomobil qiymatining bir qismini (20 ming yuan yoki 3200 dollar) xaridor qog‘oz pullar bilan to‘lagan.
Ganning so‘zlariga ko‘ra, u avtomobillarga yoqilg‘i quyish shoxobchasida ishlaydi va yoqilg‘i olgan haydovchilar choychaqa o‘rnida tashlab ketgan pullarni avtomobil sotib olish uchun to‘plab kelgan. Xitoylikning so‘zlariga ko‘ra, tangalarni qog‘oz pullarga aylantirish uchun muntazam bankka borish uning joniga tekkan. 106 ming dollarlik avtomobilni sotib olish uchun necha yil pul to‘plagani ma’lum qilinmayapti. Shuningdek, nashr bu pulga qanday avtomobil sotib olinganini ham bildirmagan.
The Shanghaiist’ning qayd etishicha, xitoylik xaridorlar o‘z xaridlari uchun birinchi marta chaqa pullar bilan hisob-kitob qilishayotgani yo‘q. Masalan, mart oyida Fudzyan viloyatida istiqomat qiluvchi fuqaro yangi xonadon uchun har biri bir yuan bo‘lgan yuz ming dona tanga bergandi.
Izoh (0)